Depërtimi i masave ajrore të ngrohta nga Veriu i Afrikës drejt rajonit të Mesdheut dhe Ballkanit ka ndikuar edhe në kushtet atmosferike në vendin tonë, duke sjellë mot të kthjellët dhe temperatura të larta për këtë periudhë të vitit.
Sipas parashikimeve meteorologjike, pjesa më e madhe e territorit do të mbetet nën ndikimin e kthjellimeve, ndërsa herë pas here do të shfaqen edhe vranësira të lehta dhe kalimtare, veçanërisht në zonat juglindore të Shqipërisë.
Pasditja dhe nata pritet të vijojnë me të njëjtat kushte atmosferike, me kthjellime dhe vranësira të pakta në të gjithë vendin.
Temperaturat do të pësojnë rritje të ndjeshme si në orët e mëngjesit ashtu edhe në ato të mesditës, duke u luhatur nga 5°C në zonat verilindore deri në 28°C, që parashikohet të regjistrohet në qarkun e Beratit.
Era do të fryjë e lehtë deri mesatare nga drejtimi verior dhe veriperëndimor, me shpejtësi që pritet të arrijë deri në 40 km/h, duke krijuar dallgëzim të lehtë në brigjet detare, me intensitet deri në 2 ballë.
Ky ndryshim klimatik ofron kushte të favorshme për aktivitete në natyrë, ndërsa qytetarëve u rekomandohet kujdes ndaj ekspozimit të gjatë në diell gjatë orëve të mesditës.
